أمي بدنياي

امي بدنياي كل حبي
نعمه اعله الروح من ربي
من تمشي شلون يا قلبي

شنو الجنه سؤال ويخطر ابالك
الجواب الجنه گعدة امك گبالك
دعاء الوالده ابكل شده يبرالك
اذا تقبل عليك انقبلت اعمالك
تريد الزهراء ترضيها
امك عالراس خليها
يالتعبك صار كل تعبي

امي الـ ويه صلاة الصبح گعدتها
قبل لا تدعي يقبل الله دعوتها
شنو طعم الحياة بلايه شوفتها
علاج اصعب مرض بالدنيه ضحكتها
الشالتني شهور داخلها
شلون بتابوت شايلها
تيهتك ليش يا دربي

حنينه أمي او حنان البيها عالفطره
صارت ام ابوها والنبي شكبره
النبي آدم بلا أم انخلق عمره
تمنه تصير امه فاطمة الزهره
ميته وبتراب مو يمي
بس عاش وياي عطر أمي
ظلت اوراق من كتبي ‏

چان البيت عامر كل كتر يضوي
الكوثر من اسمها تشوفها تروي
التموت اگباله عينه امه شيسوي
ويشاهد ظهرها من الكسر ملوي
ما اريد تطول ايامي
شفت امي تموت گدامي
لو تگضي الناس لو نحبي

شنو احساسك اسألك كلمه رايدها
اذا امك اگبالك ينسطر خدها
اديها اعله الضلع تمشي وتشاهدها
تطيح او انته ما تگدر تساعدها
محتار بهاي ليش أمي
يا فضه تصيح مواسمي
عيني اعله الباب بس تربي

لون تمطر بحر ما تطفي نيراني
ابنها أنا العزيز واكبر اخواني
صحت يم الحسن گعدي الحسن اني
بكثر ما اصيح وينج شيب لساني
چانت بالبيت شمعتنه
صارت بالبيت دمعتنه
كل روح الكون ما ظل بي

وعد وأهل السمه كلهم يسمعوني
اموت و ما افارگ دمعة عيوني
اشلوني وماتت امي فاطمه لوني
أحس شايل جبل وامشي على امتوني
عايش مشتاگ كل عمري
انه المجروح من زغري
گلبي اعله انوح متربي

الأبن لو راحت امه ابسكته يتعذب
حجيت انه الصعب لكن اكو الأصعب
البنت اكثر جرح عالأم اذا تنحب
علي والبيت كلها اتفكر بزينب
زينب تحتار بعد امها
چف العباس مو يمها
مدري الأيام شتخبي

إذا تسأل الباقي بعد عندي
مو باقة ورد لمي العمر مهدي
اظل ابجي بكثر ما هزت ابمهدي
واظل ابجي الى أن يطلع المهدي
احلف بالله والزهره ‏
ألطم للموت عالزهره
يا نار الروح بس شبي