يا لثارات الحسين

تدري وضع حسين ما داعي الشرح
گطرة المي ما نطوه گبل الذبح
وراسه من گطعوه شالوه ابرمح
نحر جدك ناده يالمهدي بونين

يابو صالح منظر ايهز العرش
بمنحر المذبوح طعنات اثنعش
عادة للميت يشيعوه ابنعش
الغبرة نعشه والرماح مشيعين

بعشر خيالة ابواليمه انسحگ
كثر دوس الخيل بانفاسه اختنگ
يابو صالح صدره وي ظهره انطبگ
سحگت بصدره حوافر اربعين

ابن ذي الجوشن گلب زينب كسر
بصدر ابو اليمه صعد يالمنتظر
شال راسه امن الگفه وحز النحر
راد يقهر عمتك بگطع الوتين

تدري بالجمّال يابن فاطمه
شاف خاتم جدك ابحقده انعمه
گطع للخنصر وسلّب خاتمه
بس اصابع اربعة بچفه اليمين

بالفله ما عدهه خيمه ام الخدر
يالثارات الخيام الـتستعر
يلله حرگوا خيامهم گال الشمر
وصاح حرگوهه بيوت الظالمين

لزينب المسبية دمعاتك تهل
حُرمة بالخمسين چتفوهه بحبل
شتموهه وركبوهه اعله الهزل
والشمر يضربهه بسياطه اللعين

تاخذ ابثار الـوگع عالمشرعه
آذه گلب الزهرة والله مصرعه
نبلة بعيونه وچفوفه امگطعه
وبعمد حيل انضرب وسط الجبين